Safar Tanha Nahi Karte

Wus’at-e chashm-e tar bhi dekhenge,
hum tujhe bhool kar bhi dekhenge. !

Hijr ki shab se hausle apne,
bach gaye toh sahar bhi dekhenge. !

Raat hone do, log sone do
chaand ko dar-ba dar bhi dekhenge. !

Ek duaa dil se chhup ke maangi thi,
us duaa ka asar bhi dekhenge. !



Ek puraana safar toh khatm hua,
ek nayi rahguzar bhi dekhenge. !

Gin toh lene do be’kafan laashen,
be’sadaa baam-o dar bhi dekhenge. !

Chhed kar dil ki raakh ko ‘Mohsin
ab ke raqs-e sharaar bhi dekhenge.

Safar Tanha Nahi Karte
Suno Aisa Nahi Karte

Jise Shafaaf Rakhna Ho
Usey Mela Nahi Karte

Bohat Ujre Howe Ghar Par
Bohat Socha Nahi Karte

Safar Jiska Muqadar Ho
Usey Roka Nahi Karte



Jo Mil Kar Khud Se Kho Jae
Usey Ruswa Nahi Karte

Teri Aankhen Ijazat Dein
To Ham Kya Kya Nahi Karte



Chalo Tum Raaz Ho Apna
Tumhein Afsha Nahi Karte

Jo Dhun Ho Kar Guzarne Ki
To Phir Socha Nahi Karte

Kabhi Hansne Se Darte Hain
Kabhi Roya Nahi Karte

Teri Aankhon Ko Parhte Hain
Tujhe Dekha Nahi Karte

Ye Onchey Pair Kese Hain
Kahein Saya Nahi Karte

Sahar Se Pooch Lo "Mohsin"
Ke Hum Soya Nahi Karte