اساں کلھیں پڑھ پڑھ انج تھی گئیوں جُل کہیں دے کول نماز پڑھوں​

اساں کلھیں پڑھ پڑھ انج تھی گئیوں جُل کہیں دے کول نماز پڑھوں​

ہتھ بدھ بھاویں ہتھ کھول پڑھوں اے پھول نہ پھول نماز پڑھوں​

ہتھ تسبی مسجد رقص کروں پا گل وچ دول نماز پڑھوں​

جتھ طارق دڑکے نہ ہوون او مسجد گول نماز پڑھوں​

توں ساڈا بنڑ نہ بنڑ دلبر ہے گالھ صفا اساں تیڈڑے ہیں ​

ڈے جام وصال دے بھر ساکوں یا زہر پلا اساں تیڈڑے ہیں​

ساڈے ڈوہیں ہتھ ہن اکھیاں تے جہیں قسم چوا اساں تیڈڑے ہیں​

رکھ آپ غلامی وچ شاکر یا ویچ وٹا ، اساں تیڈڑےہیں​

تیڈی مونجھ مصلا مسجد دا اساں پیت دیاں نفلیں نیت کھڑوں​

نہیں ہوش ریہا کہیں کلمے دا تیڈےگمدے سانول گیت کھڑوں​

تیڈا ذکر ہے مقصد زندگی دا ہر ھار کوں کیتی جیٹ کھڑوں​

تیڈی یاد اچ ارشد جتھ کھڑ گئیوں اساں ایویں جانڑ مسیت کھڑوں​

بھلا خوشیاں کہیں کوں چک پیندن ، کوئی خوشی ٹھکرا پتہ لگ ویندے​

جیڑھی چیخ پکار کوں پھند اہدیں ایہو توں چا پنڑا پتہ لگ ویندے​

جے روونڑ اپڑیں وس ہوندے توں رو ڈکھلا پتہ لگ ویندے​

جویں عمر نبھی ہے شاکر دی ، ہک منٹ نبھا پتہ لگ ویندے​

تیڈی چھاں تے پلدے پئے ہاسے کر پاسہ گئیں چن دُھپ کیتی ​

بس لُکدا چھپدا ڈیکھ تیکوں میڈا سیت وی گئے لُک چُھپ کیتی​

چن چاندڑیاں چٹیاں ڈوھ راتیں ، گئیں قہر دیاں کالیاں گُھپ کیتی​

ادھ بزم دے طارق بہنڑ والے اج بیٹھوں چُنڈ وچ چُپ کیتی​

اکھ پھڑکے پھڑکے پئی پھڑکے، ہاں پھڑکے نہ ہنج نی آندی​

ایہا ڈکھ دی تار چوھائیں پاسوں جے کھڑکے نہ ہنج نی آندی​

جے ہجر فراق دی سینے وچ بھاہ بھڑکے نہ ہنج نی آندی​

ہنج شاکر عرق لہو دا ہے لہو بڑکے نہ ہنج نی آندی​

​